No icon

Natal no Tinan Foun Hakmatek

TimorNews- Majór Jenerál Lere Anan dehan selebrasaun natal no tinan foun 2018 iha Timor-leste hakmatek tanba la sees hosi kooperasaun di’ak entre F-FDTL ho PNTL no populasaun sira.

Situasaun seguransa durante selebrasaun Loron Natal no Tinan Foun la’o ho di’ak,” Xefe Estadu Maiór FALINTIL-Forsas Defeza Timor-Leste (F-FDTL), Lere Anan Timur afirma hafoin halo enkontru ho Prezidente da repúblika, Francisco Guterres Lú Olo iha Palásiu Prezidente Ai tarak laran, foin lalais ne’e.

“Populasaun iha maturidade ne’ebé ás no maioria iha konxiénsia hodi selebra loron-boot ida ne’e ho hakmatek, maski selebrasaun Natal no Tinan Foun ida ne’e iha krize polítika nia laran.”

Hatán kona-ba impase polítika ne’ebé Timor-leste hasoru, liu-liu Parlamentu Nasionál ho sétimu governu la koopera malu hodi hala’o dezenvolvimentu iha Timor, Lere sei respeita desizaun saida de’it maka Prezidente Repúblika hanesan Komandante Supremu Forsa Armadas foti ba kestaun krize polítika.

“Seguransa nasionál iha rai laran, F-FDTL sei apoiu totalmente, enkuantu Prezidente foti desizaun.”

Nia mós sujere atu evita krize naruk iha rai Timor, dalan ida tuir nia mak fó ba maioria mak ukun. Maibé Lere la mensiona maioria oinsá.

Enkuantu kona-ba enkontru xefe estadu ho xefe forsa armada ne’e nu’udar enkontru dahuluk iha tinan 2018 nian.

Objetivu husi réniuan ne’e Lere Anan Timor hato’o ba Xefe-de-Estadu kona-ba situasaun seguransa Timor-Leste enjerál liuliu iha Natal no tinan foun.

Xefe-de-Estadu Francisco Guterres Lú Olo apresia no louva serbisu husi F-FDTL no PNTL ne’ebé mak professional tebes hodi asegura situasaun seguransa iha laran liuliu iha Natal no tinan foun.

Ba ida ne’e, Lere Anan Timur orgullu tanba Prezidente-da-Repúblika hanesan Komandante Supremu ba Forsas Armadas fó ninian apresiasaun di’ak ba serbisu sira ne’ebé F-FDTL no PNTL.

 

Comment